ထိုင်း-မြန်မာနယ်စပ် အပြည်ပြည်ဆိုင်ရာ ၀င်ထွက်ပေါက် ၄ ခုဖွင့်
28.08.2013
ခိုင်လုံတဲ့ ခရီးသွားလက်မှတ်နဲ့ ပြည်ဝင်ခွင့်ဗီဇာ ပါရှိတဲ့ မြန်မာ-ထိုင်း နှစ်နိုင်ငံသားတွေ အပါအ၀င် အခြား နိုင်ငံခြားသား ခရီးသွားတွေကို နယ်စပ်ဂိတ်တွေကနေ ၀င်ထွက်ခွင့်ပြုတဲ့ ဖွင့်ပွဲ အခမ်းအနားတွေကို မြ၀တီနယ်စပ်ဂိတ် အပါအ၀င် နယ်စပ်နေရာ လေးခုမှာ တပြိုင်တည်း ပြုလုပ်ခဲ့တယ်လို့ ဆိုပါတယ်။
အိမ်နီးနားချင်း ၅ နိုင်ငံနဲ့ ထိစပ်နေတဲ့ မြန်မာနိုင်ငံဟာ နယ်စပ်ဂိတ်ပေါင်း ၁၆ ခုရှိရာမှာ ထိုင်းနိုင်ငံနဲ့ ထိစပ်နေတဲ့ နယ်စပ်ဂိတ် ၆ ခုရှိပါတယ်။ ဒီထဲက ထိုင်းနဲ့ မြန်မာ နှစ်နိုင်ငံ သဘောတူညီချက်အရ နုိုင်ငံခြားသား ကမ္ဘာလှည့်ခရီးသွား ဧည့်သည်တွေအတွက် မြ၀တီ-မဲဆောက်၊ တာချီလိတ်-မယ်ဆိုင်၊ ကော့သောင်း-ရနောင်းနဲ့ ထီးခီး-နမ့်ဖုရော်န် စတဲ့ နယ်စပ်ဂိတ်တွေကို အပြည်ပြည်ဆိုင်ရာ ၀င်ပေါက် ထွက်ပေါက်တွေအဖြစ် ဖွင့်လှစ်ခဲ့တာပါ။ သြဂုတ်လ ၂၈ ရက်နေ့ မြ၀တီမြို့ နယ်စပ်တံတားထိပ်မှာလုပ်တဲ့ နယ်စပ်ဂိတ် ဖွင့်ပွဲအခမ်းအနားမှာတော့ ပြည်ထောင်စုဝန်ကြီး ဦးခင်ရီ က အခုလို ပြောပါတယ်။
ဝန်ကြီး ဦးခင်ရီ“ထိုင်းနိုင်ငံအကြား နယ်စပ်ဒေသ မြ၀တီ-မဲဆောက် ၀င်ထွက်ပေါက်ကို အပြည်ပြည်ဆိုင်ရာ ၀င်ထွက်ပေါက်အဖြစ် တိုးချဲ့ဖွင့်လှစ်ပေးမယ့် အခုလို မင်္ဂလာရှိတဲ့ အခမ်းအနားကို တက်ရောက် ချီးမြှင့်ပေးပါသော ဟိုတယ်နဲ့ ခရီးသွားလာရေး ၀န်ကြီးဌာန ပြည်ထောင်စုဝန်ကြီး၊ ကရင်ပြည်နယ် လုံခြုံရေးဝန်ကြီးနဲ့ ပြည်နယ်အစိုးရအဖွဲ့ ၀န်ကြီးများ၊ ပြည်နယ်၊ ခရိုင်၊ မြို့နယ်များမှ ဌာနဆိုင်ရာ အကြီးအကဲများ၊ ငြိမ်းချမ်းရေးအဖွဲ့အစည်းများ၊ တိုင်းရင်းသား လက်နက်ကိုင်အဖွဲ့အစည်းများ၊ ဒေသခံပြည်သူများ၊ ထိုင်းနိုင်ငံဘက်မှ ဧည့်သည်တော်များနှင့် တခြား ဖိတ်ကြားထားသော ဧည့်သည်တော်များ၊ သတင်းမီဒီယာများ အားလုံးကို စိတ်၏ချမ်းသာခြင်း၊ ကိုယ်၏ကျန်းမာခြင်းနဲ့ ပြည့်စုံနိုင်ပါစေကြောင်း ဦးစွာ ပနာမ နှုတ်ခွန်းဆက်သပါတယ်။ ကျနော်တို့နိုင်ငံမှာ လက်ရှိ ကျင့်သုံးနေတဲ့ စနစ်အရ နိုင်ငံတော်ရဲ့ နယ်နမိတ်ပိုင်နက်အတွင်း ၀င်ရောက်လိုသူ နိုင်ငံတကာ ခရီးသွားများနဲ့ ပတ်သက်ပြီးတော့ ကမ္ဘာလှည့်ဗီဇာ၊ လုပ်ငန်းဗီဇာ၊ ပြည်ဝင်ဗီဇာ၊ ဖြတ်သန်းဗီဇာ၊ သံတမန်ဗီဇာ၊ အကြိမ်ကြိမ် (ကျော်လွန်)ခွင့်ဗီဇာ စတဲ့ ဗီဇာအမျိုးအစား ၆ မျိုးနဲ့ ၀င်ထွက်ခွင့်ပြုလျက်ရှိပါတယ်။”
နယ်စပ်ဂိတ်တွေ ဖွင့်ထားတဲ့ နယ်စပ်တွေမှာ တိုင်းရင်သား လက်နက်ကိုင်တွေ နေရာတွေဖြစ်တဲ့အတွက် နိုင်ငံခြားသားခရီးသွားတွေအတွက် အဆင်ပြေ ချောမွေ့စေဖို့ ကူညီလုပ်ဆောင်စေချင်ကြောင်းကိုလည်း ပြည်ထေင်စုဝန်ကြီး ဦးခင်ရီ က ပြောဆိုပါတယ်။
“ကိုယ့်ပြည်နယ်ကို ဖြတ်ပြီးဝင်ရောက်လာတဲ့ နိုင်ငံတကာ ခရီးသည်၊ ခရီးသွားများကို စိတ်ထားဖြူစင်စွာနဲ့ ကျနော်တို့ တိုင်းရင်းသားတွေရဲ့ ဓလေ့စရိုက်နဲ့အညီ ခရီးသွားတွေ စိတ်ချမ်းသာ ကိုယ်ချမ်းသာဖြစ်စေဖို့၊ အဆင်ပြေချောမွေ့စေဖို့၊ လုံလုံခြုံခြုံ ရှိစေဖို့ အပါအ၀င် လိုအပ်ချက် အ၀၀ကို ကူညီဖြည့်ဆည်းစီစဉ်ဆောင်ရွက်ပေးနိုင်ဖို့၊ လုပ်ပေးရမယ်ဆိုတဲ့ တာဝန်ဝတ္တရားကလည်း တပါတည်း ပူးတွဲ ပါရှိလာပြီ ဆိုတာကိုလည်း သတိချပ်ရမှာဖြစ်ပါတယ်။”
0 comments:
Post a Comment